الحقيقة السؤال ده بيتسأل كتير وأنا نفسى سألته أول ما بدأت لو انت جاى تقرا على السريع وعايز إجابه سريعه فالإجابه إنجازا للوقت أيوه ليها مستقبل
ولكن لحظة على المستقبل القريب مش تطوير الألعاب نفسها لكن إستخدام أدوات تطوير الألعاب على المستوى البعيد هيكون تطوير الألعاب نفسها . طيب عايز تعرف تفاصيل أكتر يبقا تابع معايه
خلينا نقول الأول ونسأل انت داخل المجال ده ليه ؟
بتحبه يبقا انت صح وتابع الكلام
لو داخل بهدف الفلوس فقط ؟ فلأ مش هتنجح ومتكملش قرايه
أهمية حب المجال ده ايه ؟
المجال هنا فى مصر بالذات لسه فى بدايته يعنى لو هنقارنه بفترة العمر للإنسان فمجال تطوير الألعاب عمره لا يتجاوز السنتين
المقصود هنا مش بدايته أو ظهر امته لأ المقصود هنا مستواه الحقيقى بالنسبة للعالم اللى احنا عايشين فيه
وبما إن مجال لسه فى بدايته فمتستناش منه كتير أوى وهتحتاج تصبر عليه أوى لحد ما تقدر تطلع منه بحاجه ملموسة
وده اول حاجه محتاجها تكون معاك حب المجال لأنه محتاج صبر
تفتكر المجال ده صعب ؟
الحقيقة المجال ده هو من أصعب تلات مجالات فى السوفت وير بشكل عام إن مكنش أصعبهم
لأنه الحقيقة مش مجرد كود ولا هو مجرد front end محتاج تتعلم html - css
مش مجرد حاجات وانت بتقولها اتحركى واضربى نار
لا لا خالص
تطوير الألعاب يعنى فكرة - تصميم - تصميم للكود - كتابة الكود - أصوات - فيزكس - انيميشن - ايفكتس - نتوورك - sdk - api- الخ الخ الخ .....
الحقيقة كأنك بتعمل فيلم سينمائى أكتر منه مجرد سوفت وير أبلكيشن
وهنا بتيجى صعوبة تطوير الألعاب وليه هى ما زالت وليدة وتطورها بطىء فى مصر اللعبه محتاجه فلوس ووقت كتير وعدد ناس مش قليل ده لو هتعمل لعبه مستقله بس جودتها كويسة مش بكلمك فى GTA خالص
طب إزاى هشتغل فى مجال معقد بالشكل ده ؟
دايما أى حاجه بتشوفها من بعيد مش بتكون واضحه وتفاصيلها مش باينة ليك لما بتبدأ تتحرك ناحيتها وتقرب منها بتبدأ التفاصيل الصغيرة تظهر اكتر واكتر .
لما بتبدأ تقرب من المجال بتلاقى ان أدوات كتير سهلت عليك التطوير و إن الموضوع انتقل من مرحلة الماستر لمرحلة أقل شوية
ويرجع الفضل فى ده لعوامل كتير من أهمها إن شركات قدرت تعمل محركات ألعاب وتقدمها مجانية للديفلوبرز
بالإضافة للمئات من الإضافات اللى ممكن تستخدمها بتوفرلك وقت كبير جدا فى رحلة التطوير للعبة
وده الحقيقة تم فى كل مجالات السوفت وير الموضوع مبقاش صعب زى زمان وكل سنة الدنيا بتتسهل أكتر
طيب هشتغل فى إيه ؟
على حسب مجالك اللى انت شاطر فيه لو انت ديزاينر سواء 2D/3D ديفلوبر كويس فى الكود انيميتور او ايا كان
تقدر تشارك فى صنع اللعبة
أكتر مجال بيجيب فلوس ؟
كله بيجيب فلوس لو انت بتحب اللى بتعمله وبتتأنى فى عملك ومجتهد فيه هتقدر تجيب الفلوس اللى نفسك فيها
ويمكن المميز فى مجال تطوير الألعاب !
أدوات تطوير الألعاب:
هى مش بس بتستخدم فى تطوير الألعاب وده ميزة عظيمه جدا مش موجودة فى كل المجالات
ازاى بقا الكلام ده ؟
خلينى أوضحلك حاليا مثال من أمثلة كتيرة موجوده :- فى مجال ال VR/AR ده مجالات حاليا موجودة فى مصر بشكل كويس جدا واحتمالية نموها هنا فى مصر كبير جدا جدا . لانها ممكن تستخدم فى أمور بعيدة عن الألعاب أصلا زى مثلا ( الطب - الهندسة - محاكاة - تعليم-الخ الخ الخ )
وبالتالى ده معناه انك هتستخدم محرك ألعاب بنفس الأدوات ونفس الكود ونفس الاستخدام بس النتيجة النهائية مشروع علمى او طبى وليس بهدف عمل او صنع لعبة .
عن طريق ده هتقدر تكتسب خبره تسمحلك انك تصنع اللعبة لوحدك او تقدر تبنى portfolio خاص بيك يخليك تقدر تشتغل فى استديو من استديوهات الألعاب فى مصر .
هل فى استديوهات ألعاب فى مصر ؟
أيوة طبعا فى كتير
بس دايما اعتبرهم مرحلة تتعلم فيها وتزود فيها نفسك لأن محدش لسه وصل لمرحلة انه يكون يوبى سوفت مثلا وبالتالى خليك ذكى وانت بتختار المكان اللى هتروحه انك هتتعلم فيه وهتقدر تبنى فيه بورتفوليو خاص بيك طيب ليه استمر فى مجال تطوير الألعاب ؟
أولا لانها حبك وشغفك
ثانيا لو انت بدأت دلوقتى وطالما المجال بينمو وبيكبر فى بلدك اعرف ان هييجى اليوم اللى الشركات هتدور فيه على حد عنده خبره عشر سنين ساعتها انت هتكون من الصفوة ، ده حقيقة مش مبالغة .
تفتكر ساعتها مين هيكون أقرب ؟ شخص بقاله عشر سنين فى المجال ولا واحد لقا المجال كبر ولسه هيتعلم ؟!
الشركات فى مصر عايزة ايه أو بتدور على ايه ؟
بص الوضع حالياا اختلف شوية عن زمان عموما فى كل مجالات السوفت وير فى الغالب
الشركة عايزة شخص يقدر يعمل التاسك ده ، بس ؟ ايوة بس
لو انت هتقدر تعمل المطلوب تعالى يا باشا
طيب منا ممكن اعمل الشغل والحاجه تكون شغاله بس معمولة بشكل مش كويس
ايوة صح وهنا تقدر تحدد ليفيل الشركة
والله لو شركة محترمة وكبيرة هتلاقى فى اهتمام بالجودة والشغل منظم وكل حاجه واضحة من الأول
كل ما الامور ده بتقل كل ما قيمة الشركة فى السوق بتقل وهتقلل من اللى شغالين فيها برضوا .
المرتبات ايه نظامها ؟
الحقيقة انا كنت متوقع اننا هيكون مرتباتنا قريبة من اللى شغالين ios لاننا بنتعب وبنعمل شغل مش طبيعى
لكن لبعض الظروف اللى هتكلم عنها بعد كده زى ان السوق اتملى ديفلوبرز لمجرد خروجهم من كورس او من مكان معين وهما مش عارفين انهم مش game developers خالص فاى شركة بقت تنزل اى بوست تلاقى عدد كبير مقدم والحقيقة اللى بيحصل ان اى حد ممكن يتقبل لان معظم الشركات مش عارفه تقيم مطور الألعاب ده ازاى اصلا فبيتقبل ولان مفيش جودة ولا خبرة فممكن يبدأ باى مبلغ فاللى بيحصل حاليا للأسف ان مرتباتنا فى الشركات معظمها عادية زى الباقى مش مختلفة يعنى اسال صاحبك ال شغال فى اى مجال تطوير آخر طبيعة مرتباته كام وانت مش هتختلف كتير .
يمكن ده أول مرة أكتب فيها وأشاركم فيها تجاربى إن شاء الله أكتب أكتر وأحاول أعمل مواضيع مختلفة
مستنى ردودكم وتفاعلكم ولو فى موضوع حابيين تقروا عنه تقدروا تكتبو فى الكومنتات تحت
ولو فى أى أخطاء ممكن تكتبلى برضوا وهحاول أصلحها فى المقالات اللى جايه شكرا جزيلا .
تفتكر السوق محتاج ايه علشان يتحسن ويبقي في شركات كبيره بحجم يوبي سوفت تبقي موجوده في